Kantadenn An Aval hag ar C'halis
An Aval hag ar C’halis
Kantadenn
I- DIGORADUR
Kroazioù ha peulvanoù
Setu aze an disoc'hoù
Istor Mab-den war hon douaroù
Brezel ha peoc'h an eneoù
Selaouit 'ta Drouized ha Beleien
Kredit atav paganiz ha kristenien
Setu an div gredenn, an div elfenn
'Vit ar re greñv, ar beorien.
Avel, luc'hed ha kurun,
Emañ an dud war o hun
Luc'hed, avel ha kurun
E-giz-se emañ ar c'hustum.
~~~
II- MOJENN
Ul luad koumoul divent
A zue gorre Loc'h Lomond.
Ar bugel a soñje dezhañ
E nije kuit evit an emgann
Eneoù an harozioù kozh
'Nur ganañ ar Moitura en-dro.
Azezet war geot druz ar glen
E selle ouzh skedoù ramzel
Pennoù Oisin, Fin ha Kouc'houlin.
Gedet en doa an Doueez vras
Banba hec'h-unan a oa aet e-biou
Marteze hep dezhañ d'e c'houzout.
Ur mouchig avel a floure ar grec'h
Hag er flouradenn-se e kleve
Mouezhioù ar meuriad O'Niall.
Divent ha peurbadus e talc'he penn
D'an enebour ha d'an amzer
Menezioù kozh e vreudeur gelt.
Strakadennoù kleze ha skoedoù
A leunie e spered bugel gouez
Pa grene douar e hendadoù
Dindan karnoù ar c'hezeg
Ha ma ouele en avel
Youc'hadennoù an Uhel-Douariz.
Serriñ a reas e zaoulagad huñvreus
A-benn peurechuiñ e aisling*.
Roue meur e vefe en e c'hlen
Ha Seobhan he blev hir
E briñsez vihan a-viskoazh
a zeufe d'an emgann gantañ.
Pep un askolenn en dorn
C’hwezhet an huñvre diouzh o spered
E tiredas an daou vugel-roue
Betek ti-plouz an tad-kozh.
Evel boaz e kevrin an oaled
E klevfent dibenn o c’hontadenn.
Aisling: gouezeleg: a dalvez gwelidigezh
~~~
III- DIVIZ
Marzhin, ma zad, mar plij lavar din,
Er stered 'm eus gwelet ur sin
N'ouzon ket re petra a dalvez
Ha bez' e vefe ur bed nevez ?
Selaou 'ta, ma mabig
Dav eo dit chom fizius ha sioulik,
Goude ar vuhez hag an delioù gwez
Atav e chom ar Garantez.
~~~
IV- DISTRUJ
E-Kreiz ar goadeg
Dindan bolz ar stered
An doueed kozh a c'hede
War ar bobl hag hec'h ene.
Er c'hlazenn hag en aour
Kenkoulz ar pinvidik hag ar paour
A gave dour o buhez
Da boanioù o femdez.
Un den bras ha gwenn e vrozh
A guzulie gant ar re gozh
Dazont ar c'hlan 'oa en arvar
Setu aet kuit an alarc'h.
Ar gredenn nevez 'zo erruet
Enez Mona a zo distrujet
Ur beleg yaouank 'deus kanet
Ar gousperoù d'ar re oadet.
Lug ha Belenos a zo bet renket
Koulskoude e oant meuleudet
War ar menez hag er frankizenn
Pep hini a gave e awen.
Ar frouezhenn sakr ha melen
Bremañ 'zo aet da arouez fall
Ur c'halis 'zo e plas Maen Fàl
Ha div gredenn uhel er vojenn.
Echu eo bale Mois er gouelec'h
E bobl 'zo bremañ laouen ha seder
Lezennoù nevez en deus bet
War lein ar menez dibabet.
V- GOUESTLIDIGEZH
Tostaat a ra ar vamm
A gammedoù diasur
Emañ nepell diouzh an tan
Dougen a ra he c'hrouadur.
An oferenner a gemer ar gomz
O sellet ouzh an neñv, o c'houlenn groñs
A-us d'an tan e tremen ar bugel
Ha kinniget eo d'ar pevar avel.
Belenos, lagad ar spered,
E-kreiz kelc'h an doueed
Grit ma vezo benniget
Ar bugel-mañ ha degemeret.
Dre Teutates ha Dana
Dre Lug ha Kernunnos
Doueed ha Doueezed Keltia
Ar c'hrouadur-mañ ‘zo da ouestlañ.
Dre an douar-mañ war da zorn
Dre an holen mor war da vuzell
Bez degemeret e pep korn
Hag e broioù ar seizh avel.
~~~
VI- ROUE
E-kreiz kompezenn vras Tara
Ur youc'hadenn uhel a savas
An drouiz meur e-kreiz a c'halvas
Seizh avel kounnarus Keltia.
Avelioù, kurun, luc'hed ha glav
Freuziñ a reas o heklev,
Gouestlet e oa ar roue nevez,
Fuc'hioù ar seizh breur a c'hwezhe.
~~~
VII- DIVIZ
Marzhin, ma zad, mar plij, lavar din,
Ha daoust eo mat ar sin,
Ar gwez a zo bet diskaret
Ha ganto ma huñvreoù a zo aet.
Gouzout a ran ma mabig,
Poent eo deomp mont kuit
Hon doueed 'zo bremañ kousket
Met ar feiz kozh a zo chomet
VIII- DIBENN
Marzhin kousket don en e vez
Ar C'hrist gedour war ar groez
Setu aze hol lodenn herezh
Pep hini a zigoro e feiz.
E sell glas troet war ar Gwalarn
Ar bugel a zalc'he e gleze houarn,
Emzivad en em gave bremañ,
Ne ouie ket mui e santimant.
Marzhin kousket don en e vez
Ar C'hrist gedour war ar groez
Setu aze hol lodenn herezh
Pep hini a zigoro e feiz
(Kanet hag enrollet gant “Mouezh Paotred Breizh”)